Onte houbo voda na Ulla. Casaron Lucía e David, no que foi o segundo casamento entre unha moza da Ponte Ulla e un rapaz do barrio madrileño de Usera nun par de anos. E a cousa parece non parar aí, porque xa se está cocendo algunha nova parella, polo que desde a Casa da Ulla propoñemos iniciar os trámites para un irmandamento A Ponte Ulla-Usera. Debería celebrarse canto antes unha reunión ao máis alto nivel entre Odón e Gallardón para darlle cobertura oficial a esta tendencia sentimental.

A festa de onte foi longa e divertida, e dela quédanos hoxe o corpo mallado pero satisfeito e este vídeo que lle preparamos aos noivos. Fixémolo entre os amigos, pensado como un videoclip e como unha invasión. Deu o seu traballo porque somos unha banda de inexpertos, pero pagou a pena polo ben que o pasamos co conto.